【被豆姐拋棄的生活真係好開心】
終於忙完書展前準備，想輕鬆返日，但又唔想太逼，又想做啲特別嘢。但香港有「特別」又「唔多人」嘅地方咩？！
來來去去咪又係行街睇戲食飯，於是我就秘密地Plan咗一日行程，想同豆姐癲返日，畀個驚喜佢。
「Yo~~~今個星期六，將你嘅身軀交畀我，叔叔帶你去癲返日！」
點知豆姐竟然話：
「但我唔想癲喎…我淨係想訓覺…」
「但、但係！」
「我病咗…」
唔怪得豆姐把聲變到老牛咁，我知道如果同佢講，一早準備咗行程，佢一定會死頂咁出嚟，所以…
「咁妳今日好好休息吓～我都留喺屋企做嘢。」
「好啦…拜拜」
於是我就自己一個人黎咗位於西貢嘅Tikitiki Bowling Bar
「先生，幾多位？」
「一個…」我眼泛淚光咁講。
嗰日我真係玩得好開心…
首先一個人打保齡，我見隔籬球道嘅一家大細望住我…
流露出「又唔係玩得勁，但一條友霸一條道」嘅疑惑眼神。
打完保齡，我一個人去畫日式面具，身邊嘅小朋友有家長幫佢哋全程錄影，亦有情侶幫大家互畫面具…
而我，自己畫完戴上面具自拍。
隱藏喺面具嘅底下，係一張寂寞的臉。
玩到攰攰地，再一個人食自助餐，睇唱歌跳舞表演，睇魔術…
食完飯，我仲一個人去學調酒，調酒師話一個人飲悶酒就見得多，但一個人學調酒再即場飲返，真係第一次見…
嗰刻我差啲忍唔住喊左咗黎。
最後，我孤身隻影咁離開西貢。
頭先我所講嘅咁多活動，的確喺晒同一個地方，足夠一家大細或情侶玩足全日！
老實講我真係好開心，唔係呃你。
但我相信，下次可以帶埋豆姐去會更開心…
Search